چھوٹی گاڑیوں کی فروخت میں نمایاں کمی

موجودہ حکومت کی جانب سے ٹیکسوں میں اضافے اور سخت آٹو فنانس پالیسی کے برے اثرات سامنے آنا شروع ہوگئے، ایک ہزار سی سی اور اس سے کم کی گاڑیوں کی فروخت میں نمایاں کمی ہوگئی۔

رپورٹ کے مطابق گزشتہ ماہ جنوری کے دوران مختلف کمپنیوں کی مجموعی طور پر 20 ہزار 610 کاریں فروخت ہوئیں جو اس سے پچھلے ماہ دسمبر 2021ء کے 27 ہزار 331 کے مقابلے میں تو 25 فیصد کم ہے لیکن ایک سال قبل جنوری 2021ء کے مقابلے میں اب بھی 18 فیصد زائد ہے۔

ماہرین کے مطابق حالیہ فنانس ترمیمی بل میں گاڑیوں پر ٹیکسوں میں اضافے اور اس سے پہلے اسٹیٹ بینک کی سخت آٹو فنانس پالیسی کی وجہ سے کاروں کی فروخت میں کمی دیکھی جارہی ہے۔

پاکستان آٹو مینو فیکچرز ایسوسی ایشن کے مطابق پاکستان سوزوکی کی مجموعی طور پر 9 ہزار 37 گاڑیاں فروخت ہوئیں، جن میں آلٹو کار کی فروخت 3 ہزار 864 اور ویگن آر کی 1537رہی، کلٹس گاڑیوں کی فروخت 1172، بولان 956 اور راوی کی 1508 رہی، جبکہ سوئفٹ کار کی فروخت صفر رہی۔

اسی طرح انڈس کمپنی کے تمام ماڈل کی کاروں کی فروخت 6 ہزار 797 رہی، جس میں کرولا یارس کی فروخت 5 ہزار 528 ریکارڈ کی گئی جو گزشتہ ماہ کسی بھی گاڑی کی سب سے زیادہ فروخت ہے۔ اسی کمپنی کے فورچونر ہیلکس کی فروخت 1269 رہی جبکہ ہونڈا کار کے سٹی سوک کی فروخت 3 ہزار 646 رہی جبکہ ہنڈائی نشاط کے تمام ماڈل کی مجموعی فروخت 612 رہی۔

 واضح رہے کہ رواں مالی سال کے دوران گاڑیوں کی فروخت میں نمایاں اضافہ دیکھا جارہا تھا، جس کا اندازہ اس سے لگایا جاسکتا ہے کہ رواں مالی سال کے جولائی 2021ء تا جنوری 2022ء کے 7 ماہ کے دوران مجموعی طور پر تمام کمپنیوں کی کاروں کی فروخت ایک لاکھ 56 ہزار 586 رہی جو اس سے پچھلے مالی سال کے 7 ماہ کے مقابلے میں 61 فیصد زائد ہے۔

جنوری 2022ء کے اعداد و شمار سے معلوم ہوتا ہے کہ حکومتی پالیسوں کی وجہ سے فروخت کی رفتار میں کمی آنی شروع ہوگئی ہے، جنوری میں 1300 سی سی اور اس سے اوپر کے ماڈل کی گاڑیوں کی فروخت میں صرف 5 فیصد کمی آئی ہے جو انتہائی کم شرح ہے جبکہ 1000 سی سی  گاڑیوں کی فروخت میں 37 فیصد اور اس سے کم کی گاڑیوں کی فروخت میں 53 فیصد کی نمایاں کمی آئی ہے، جس کا مطلب ہے کہ حکومتی پالیسوں سے متوسط طبقہ زیادہ متاثر ہوا ہے، زیادہ آمدن والے طبقے پر ان اقدامات کا زیادہ اثر نہیں پڑا۔

دوسری جانب ٹرک، بسوں، ٹریکٹرز، موٹر سائیکل اور رکشوں کی فروخت میں گزشتہ ماہ اضافہ ریکارڈ کیا گیا ہے، جنوری میں 690 ٹرک فروخت ہوئے جبکہ دسمبر 21ء میں 299 ٹرک فروخت ہوئے تھے، اسی طرح جنوری میں 88 بسیں فروخت ہوئیں جبکہ دسمبر میں 36 بسیں فروخت ہوئی تھیں، جنوری میں 4 ہزار 966 ٹریکٹرز فروخت ہوئے جو دسمبر کے مقابلے میں 11 فیصد زیادہ ہے، موٹر سائیکلوں اور رکشوں کی فروخت میں بھی 8 فیصد اضافہ دیکھنے میں آیا۔

from SAMAA https://ift.tt/FYbEr0H