بھارت: سات ریاستوں میں 14 شادیاں کرنیوالا ملزم گرفتار

بھارت کی 7 ریاستوں میں 14 خواتین کے ساتھ شادی کرنیوالے ایک شہری کو اڑیسہ میں گرفتار کرلیا گیا۔

بھارتی میڈیا کے مطابق ریاست اڑیسہ کے دارالحکومت بھونیشور سے تعلق رکھنے والے 60 سالہ شخص نے 48 برس میں 14 شادیاں کیں، پولیس کے مطابق اس پر الزام ہے کہ وہ بیویوں کو چھوڑنے سے قبل ان سے رقم لے کر بھاگ جاتا تھا۔

بھونیشور پولیس کے ڈپٹی کمشنر اوم شنکر داس کا اس حوالے سے کہنا ہے کہ یہ شخص اپنا تعارف ڈاکٹر کہہ کر کرواتا اور اعلیٰ تعلیم یافتہ خواتین سے شادی کرتا تھا، متاثرہ خواتین میں پیرا ملٹری فورس میں کام کرنیوالی ایک خاتون بھی شامل ہے۔

رپورٹ کے مطابق پیر کو گرفتار کئے گئے شہری نے خود پر لگے الزامات مسترد کردیئے۔ پولیس کے مطابق ملزم نے پہلی شادی 1982ء جبکہ دوسری 2002ء میں کی، جن سے اس کے 5 بچے ہیں۔

پولیس ڈپٹی کمشنر اوم شنکر داش کا کہنا ہے کہ 2002ء اور 2020ء کے درمیان اس شہری نے دیگر خواتین کے ساتھ رشتوں کی ویب سائٹس کے ذریعے پہلے دوستی کی اور بعدازاں دیگر بیویوں کے بارے میں بتائے بغیر ان سے شادیاں کرلیں۔

ملزم اپنی آخری بیوی کے ساتھ بھونیشور میں رہ رہا تھا جو دہلی کے ایک اسکول میں پڑھاتی تھیں، جنہوں نے دیگر شادیوں کا علم ہونے کے بعد پولیس میں شکایت درج کرائی تھی، جس کے بعد ملزم کو کرائے کے مکان سے گرفتار کیا گیا۔

اوم شنکر داس نے بتایا کہ ملزم درمیانی عمر کی خواتین سے شادی کرتا، جن میں سے زیادہ تر طلاق یافتہ ہوتیں اور وہ دوبارہ شادی کرنا چاہ رہی تھیں، اور ان کو چھوڑنے سے پہلے وہ ان سے رقم وصول کرتا۔

بھارتی میڈیا کے مطابق ملزم نے دہلی، پنجاب، آسام، جھارکھنڈ اور اڑیسہ سمیت 7 ریاستوں میں خواتین کو دھوکہ دیا، جس کی پہلی دو بیویوں کو تعلق اڑیسہ سے ہے۔

from SAMAA https://ift.tt/vNDLfKr