پاکستان نے بھارت میں مسلمانوں کیخلاف طاقت کے استعمال کی شدید مذمت کرتے ہوئے عالمی برادری سے مطالبہ کیا ہے کہ بھارت میں اسلاموفوبیا کی تشویشناک صورتحال کا نوٹس لے۔
بھارت میں گستاخانہ بیانات کیخلاف احتجاج کرنیوالے مسلمانوں پر طاقت کے بدترین استعمال اور فائرنگ سے 2 مسلمانوں کی شہادت اور متعدد کے زخمی ہونے کے واقعے پر پاکستان نے شدید مذمت کی ہے۔
ترجمان دفتر خارجہ کا کہنا ہے کہ بھارتی مسلمان بی جے پی رہنماؤں کے گستاخانہ بیانات کیخلاف احتجاج کررہے تھے، بھارت میں مسلمان مظاہرین کیخلاف طاقت کا وحشیانہ استعمال کیا گیا، رانچی میں بھارتی فورسز کی بربریت سے 2 مسلمان شہید اور 13 زخمی ہوئے۔
ترجمان نے مزید کہا کہ ہندوتوا کی حامی بھارتی حکومت نے مسلمانوں پر مظالم کی نئی مثال قائم کردی، بھارتی فورسز نے نہتے مسلمان مظاہرین پر بے دریغ گولیاں برسائیں، اترپردیش میں اب تک 227 مسلمانوں کو گرفتار کیا جاچکا ہے۔
پاکستان نے عالمی برادری سے بھارت میں اسلاموفوبیا کی تشویشناک صورتحال کا نوٹس لینے کا مطالبہ کرتے ہوئے کہا کہ بھارتی حکومت کے اس پُرتشدد طرز عمل سے مسلمانوں کی مشکلات بڑھیں گی۔
ترجمان کا کہنا ہے کہ بھارتی حکومت کا مسلمانوں کے حقوق غصب کرنے پر احتساب کیا جائے، یقینی بنایا جائےکہ آئندہ بھارتی مسلمانوں کے ساتھ ایسا سلوک نہ ہو۔
واضح رہے کہ بی جے پی رہنماؤں کی جانب سے پیغمبر اسلامﷺ سے متعلق نازیبا بیان کے بعد دنیا بھر کے اسلامی ممالک نے بھارت سے شدید احتجاج کیا، کئی مسلم ممالک نے بھارتی سفیروں کو طلب کرکے احتجاجی مراسلے تھمائے، وسطی ایشیائی ممالک میں بھارتی مصنوعات کے بائیکاٹ کی مہم بھی شروع کردی گئی ہے۔
بھارت میں مسلمانوں کی جانب سے شدید احتجاج کیا جارہا ہے، جس میں ہزاروں کی تعداد میں لوگ شریک ہورہے ہیں، بھارتی حکومت سے نوپور شرما کی گرفتاری کا بھی مطالبہ کیا جارہا ہے۔
from Samaa - Latest News https://ift.tt/aYKS5c3
No comments:
Post a Comment